ТҮЛЕТУ
Сен күтімге арналған ең жақсы (немесе ең қымбат) құралдармен қамдануыңа болады, алайда, терінің бетіндегі өлі жасушаларды жоймасаң, косметика өндірісінің жетістіктері саған ешқандай да пайда әкелмейді. Ылғалдандырғыш құралдар терінің терең қабатына сіңуі үшін түлету рәсімін жасау қажет. Ал күн сәулесінен зақымданған тері нәзік келеді, табиғи түйіршіктері бар түлеткіш құралдарды таңда – ол ұқыпты күтім жасалуын қамтамасыз етеді және де қосымша зиян келтірмейді.
С ВИТАМИНІ
Қоршаған ортаның факторлары (ең бірінші кезекте күн сәулесі) 80%-ға дейін терінің қартаю белгілерін тудыратынын сен білесің бе? Міне, сол себепті күннен қорғайтын құралдарды пайдалану өте маңызды. Ал теріні тек қорғап қана қоймай, оның жағдайын жақсарту үшін құрамында С витамині бар құралдарды таңда.
ПИГМЕНТТІК ДАҚТАР
Маңдайдағы, беттегі және үстіңгі еріннің жоғарғы жағындағы қошқыл дақтар күздің алғашқы айларында пайда болуға бейім. Беттің түсін тегістеу үшін, меланиннің бөлінуін азайтатын және тері түсінің өзгеруімен күресетін құралдарды пайдалан.
ЖӘНДІКТЕРДІҢ ШАҒУЫ
Жәндіктердің шағуы жағымсыз қышынуды тудырумен қатар, артынан тыртық қалдыруы да мүмкін. Оған жол бермеу үшін, күнделікті теріңді ылғалдандырып отыр және тері түсінің өзгеруінің алдын алатын құралдарды пайдалан. Егер жәндіктердің шаққан ізі өздігінен кетпесе, сен қашанда оны консилердің көмегімен жасыра аласың.
ТҮНГІ КҮТІМ
Кешкі рәсімдер – кешенді күтімнің қажетті бөлігі. Тазартқыш құрал мен тоник ластануларды жояды, ал сарысу мен түнгі крем сен ұйықтап жатқанда теріге күтім жасайды. Жаз біткенде және әдеттегі өмір ырғағына оралатын уақыт келген кезде осы ереже туралы ұмытпа.
