Қалай танысқандарыңыз туралы айтып беріңізші?
Наталья: 2010 жылы бізді ортақ досымыз таныстырды. Менің таныс фотографым кездесуге өзінің досымен келетінін айтты - мен бұған аса қуандым деп айта алмаймын (күледі)
Мурад: Мен кейіннен көп уақыт бойы досымнан оның телефон нөмірін сұрап алуға тырыстым, бірақ соңында оны «Одноклассники» желісінен іздеуге тура келді. Сол кезде екеуміздің көрші тұратынымыз анықталды! Мен күн сайын таңертең велосипедпен көшеге шығып, спортпен шұғылданатындай кейіп білдіріп жүрдім - шындығында мен Наташаға фотосуреттерді лақтырып, серуенге шығуды ұсынып жүрген болатынмын. Егер одан жауап болмаса, үйге барып ұйықтап қалатынмын.
Ең алғашқы бірлесіп шыққан саяхаттарыңыз естеріңізде ме?
Мурад: 2011 жылы біздің ең алғашқы саяхатымыз болды - Наташа маған Барселонаға түсірілімге келді. Жұмыстан кейін біз қарапайым туристер сияқты қала аралап, фотоға түстік. Эксперименттер барысында Follow Me позасы мен стилистикасы өзінен-өзі пайда болды, ол өте әсерлі көрінді - сондықтан біз жаңа тәсілдерді қолдана және жаңа кадрлар іздестіре бастадық.
Саяхат туралы блог идеясы қашан келді?
Мурад: Испаниядан Мәскеуге оралғаннан кейін инстаграмдағы менің жеке аккаунтымды тақырыптық #FollowMeTo фотоблогына айналдырдық. Ол кезде платформа жаңадан дами бастады, сондықтан біз алғаш шыққан блогерлер болатынбыз, әсіресе Ресейде. Біз демалуға барған әр елде жаңа стилистикамен түсіре бердік. Осылайша барлығы өз жалғасын тауып кетті. Аккаунт кеңінен танымал болғанға дейін жарты жыл өтті. Сәтті блогтың үш негізі - тұрақтылық, шыдамдылық және өз идеясына деген сенім.
Сіздер үшін саяхат жұмысқа айналды деп айта аласыздар ма, әлде процестен әлі де ләззат аласыздар ма?
Мурад: Әдетте саяхат ең көбі 2 аптаға созылады. Бір айға Америкаға немесе жарты жылға Азияға кетіп қалатындарға қызыға қараймыз. Бір қарағанда біздің жұмысымыз сіз армандағандай болуы мүмкін, бірақ түсірілімдер өте ауыр процесс. Біз жаңа қаладан немесе елден жай ғана ләззат алу үшін үзілістер жасап тұруға тырысамыз - таңғы асқа арналған қызықты жерлерді, керемет көрініс ашатын романтикалық шатырларды іздейміз.
Наталья: Егер саяхат процесі біз үшін жалықтыратын жұмысқа айналса, #FollowMeTo жобасы болмас еді. Дегенмен, біз бармаған әлі қаншама жер бар!
Қандай жаңа жерлерге баруды армандайсыз?
Мурад: Географиялық жақын елдерді кейінге қалдырып, алыс жағалауларға ұмтылу деген дағды бар. Дегенмен осы жылы біз үшін Греция нағыз жаңалық болды! Келесі пункт - скандинавия елдері.
Саяхаттауға арналған косметика салғышыңызға не кіреді?
Наталья: Мен өзіммен бірге ұшаққа патчи және мата маскаларын алып жүремін, босаңсытатын майларды қолданамын, құрғаудың алдын алу үшін суды көп ішемін. Кейде біз бір айда климаты мен сағат белдеулері әр түрлі 5 елді ауыстырамыз, бұл ағза үшін үлкен күйзеліс. Сондықтан тері мен шашқа күтім жасауға аса көп көңіл бөлемін, йогамен және медитациямен шұғылданамын. Мәскеуге оралған кезде моншаға барамын - бұл мені құтқаратын салт.
Жаңа жылды қарсы алуға арналған мінсіз жер?
Наталья: Біз Жаңа жылды көптеген елдерде атап өттік, бірақ біз үшін бұл мереке отбасылық мереке болып қала береді. Қар, оливье, шырша, шампан және ең жақын адамдар жаныңда болуы керек. Осы жылы Жаңа жылды Мәскеуде атап өткіміз келеді, содан соң 1-2 күндері жылы елге аттанамыз.
